Laget fullførte det krevjande løpet på 7 timar og 41 minutt, noko som heldt til ein solid 12. plass i konkurransen. Førsteplassen kom i mål om lag to timar tidlegare.
– Vi er stolte over innsatsen og over å ha representert både Ørsta vidaregåande skule og Møre og Romsdal fylkeskommune i eit av dei mest spektakulære løpa på Sunnmøre, seier deltakarane.
Måtte omstille seg før start
Oppladinga vart ikkje heilt som planlagt. Natta før løpet vart ein av lagsmedlemmane råka av omgangssjuke og måtte trekkje seg frå konkurransen. Det førte til ei rask omorganisering av laget, der Øyvind Ytre-Eide tok på seg ei ekstra etappe for å sikre at laget kunne gjennomføre.
Trass i utfordringa viste laget stor lagånd og gjennomførte alle etappane på imponerande vis.
Høge ambisjonar for 2027
Deltakarane er allereie motiverte for neste års utgåve av løpet.
– Neste år skal vi vere betre førebudde. Vi har høge ambisjonar og skal bruke året på å trene meir og stille sterkare. Målet er å klatre på resultatlista og vise kva vi er gode for, seier laget.
Utfordrar resten av fylkeskommunen
Etter å ha vore åleine om å representere både vidaregåande skular og fylkeskommunale verksemder i årets konkurranse, sender Ørsta vidaregåande skule no ei tydeleg utfordring til resten av organisasjonen.
– Vi håpar fleire vil vere med neste år. Vi utfordrar spesielt dei andre vidaregåande skulane i Møre og Romsdal til å stille lag i 2027. Litt vennskapleg konkurranse mellom skulane hadde gjort arrangementet endå kjekkare, og samstundes bidrege til å fremje både folkehelse, samhald og arbeidsglede.
Desse representerte Ørsta vgs i årets «Fyr til fyr»: Fride Jøsok, Kamilla Halvorsen Kløvning, Guro Buset, Øyvind Ytre-Eide og Beate Mork.
Med erfaring frå årets løp i bagasjen er laget klare for å satse vidare – og håpar å møte fleire lag frå både vidaregåande skular og andre delar av fylkeskommunen ved startstreken neste år.